हेटौँडा। पूर्वी मकवानपुरको बागमती गाउँपालिका ५ मा पहिरोले घर बगाउँदा एक जनाको मृत्यु र छ जना बेपत्ता भएका छन्। बागमती गाउँपालिका ५ भोर्लेनीस्थित सिक्रे दोभानमा भल बाढीसहित आएको पहिरोले बगाएर काभ्रे घर भएका सञ्चमाया स्याङ्तानको मृत्यु भएको हो।
बागमती गाउँपालिका वडा नं. ५ का वडाध्यक्ष विजयकुमार भ्लोनका अनुसार पहिरासँगै बगेको घरलाई घर नजिकै रहेको खोलामा आएको बाढीले बगाएको थियो। पहिरोमा परेर गम्भीर भएका अन्दाजी ५५ वर्षीया स्याङ्तानको मङ्गलबार स्थानीय भोर्लेनीस्थित मेडिकलमा उपचारको क्रममा मृत्यु भएको वडाध्यक्ष भ्लोनले जानकारी दिनुभयो।
जिल्ला प्रहरी कार्यालय मकवानपुरले पहिरोमा परेर अक्कलबहादुर स्याङ्तान, निजका ज्वाइ जीवन पहरी, छोरी शिला पहरी स्याङ्तान, चार वर्षीय नाति, डेढ वर्षीया नातिनी र पाउन बसेका पासाङ घिसिङ बेपत्ता भएका छन्। जिल्ला प्रहरी कार्यालय मकवानपुरका अनुसार घटनास्थलमा प्रहरी टोली पुगेको र बेपत्ता भएकाहरूको खोजी कार्य जारी छ।
