वासिङ्टन। सङ्घीय अनुसन्धान ब्युरो (एफबिआई)ले राष्ट्रपति जो बाइडेनको डेलावार राज्यको विल्मिङ्टनस्थित निवासमा खानतलास गरेको छ । खोजविनका क्रममा ‘गोप्य’ लेखिएका केही दस्ताबेज र उहाँका हस्तलिखित टिपोट एफबिआई आफ्नो स्वामित्वमा लिएको राष्ट्रपतिका वकिलले बताएका छन्।
राष्ट्रपति बाइडेनले स्वैच्छिकरूपमा एफबिआईको टोलीलाई खानतलासको अनुमति दिनुभएको थियो। यद्यपि, उक्त टोलीले खानतलासीको पुर्जी प्रस्तुत नगरे पनि विशिष्ट प्रकृतिको खानतलासीमा कुनै समस्या नभए पनि यसले राष्ट्रपतिलाई अप्ठ्यारोमा पारेको छ।
गत पुस १२ गते राष्ट्रपतिका वकिलहरूले मध्यावधि निर्वाचनको केही समयअघि वासिङ्टनको पेन बिडेन केन्द्रको पूर्वकार्यालयमा केही गोप्य दस्ताबेज फेला पारेको खुलासा गरेपछि अनुसन्धान गर्न एफबिआई टोली राष्ट्रपतिको निजी निवासमा पुगेको हो। बाइडेन उपराष्ट्रपति रहेका बेलाका छ वटा गोप्य दस्ताबेज विल्मिङटन निवासको पुस्तकालयबाट टोलीले फेला पारेको छ। राष्ट्रपतिले पुस्तकालयलगायत स्थानमा केही नभएको अनुसन्धान टोलीलाई बताउनुभएको थियो। आफ्ना पूर्ववर्ती डोनाल्ड ट्रम्पको अशान्तिपूर्ण बहिर्गमनपछि अमेरिकी जनतामाझ आफ्नो सत्चरित्रयुक्त छवि रहेको चित्रण गर्ने प्रयासमा राष्ट्रपति बाइडेनलाई ठेस लागेको छ।
तेह्रघण्टा लामो खोजविनका क्रममा गोप्य लेखिएका छ वटा दस्ताबेज अनुसन्धान टोलीले आफ्नो नियन्त्रणमा लिएको राष्ट्रपतिका निजी कानुन व्यवसायी बब बउरले बताउनुभएको छ। बाइडेन सिनेटर र उपराष्ट्रपति रहेका बेलाका दस्ताबेज टोलीले नियन्त्रणमा लिएको जानकारी पनि उहाँले दिनुभयो। टोलीले लिएका दस्ताबेज कति गोप्य हुन् भन्ने स्पष्ट भएको छैन। अनुसन्धान टोलीले लिएका दस्ताबेज कानुन मन्त्रालयले समीक्षा गर्नेछ। रासस/एपी
